Diqqat! Portal test rejimida ishlamoqda!
Menu

Yangiliklar

"Bolalarning texnik ijodkorligi" festival-tanlovi bo‘lib o‘tdi

06.07.2017 3318
Yuklab olish
Manba: Nazokat Usmonova, Otabek Mirsoatov (surat), O‘zA Tavsif:

O‘zbekiston Respublikasi Xalq ta’limi vazirligi tomonidan tashkil etilgan "Bolalarning texnik ijodkorligi" festival-tanlovi yurtimizning ko‘plab iqtidorli o‘quvchi-yoshlarining texnik kashfiyotlari maydoniga aylandi. O‘zbekiston Badiiy akademiyasi Markaziy ko‘rgazmalar zalida mazkur ijodiy loyihaning yakuniy bosqichi bo‘lib o‘tdi. Rahmatilla Mahmudov Norin tumanidagi 40-maktabning 9-sinfida o‘qiydi. "Yosh fiziklar" to‘garagiga qatnovchi bu yigitcha mo‘jaz changyutkich, raketa modelini yaratdi. Navoiylik Firdavs Shomurodov yasagan minirobot murakkab sanoat hududlari, konlarda bemalol harakatlanib, obyektlarni tasvirga tushirsa, andijonlik Latifjon Mannopov tayyorlagan sensor klaviaturali musiqa asbobidan ajib kuy taraladi. Xalq ta’limi vaziri o‘rinbosari D.Kenjayev va boshqalar yurtimizda yosh avlodning qobiliyati va ijodiy salohiyatini kashf etish, o‘g‘il-qizlarning iste’dodi to‘g‘ri shakllanishi uchun imkoniyat yaratish masalasiga doimiy e’tibor qaratilayotganini ta’kidladi. O‘zbekiston Respublikasi Vazirlar Mahkamasining 2011-yil 28-fevraldagi "Maktabdan tashqari ta’lim tizimini yanada takomillashtirish chora-tadbirlari to‘g‘risida"gi qarori ijrosi doirasida mamlakatimizning barcha hududlarida "Barkamol avlod" bolalar markazlari faoliyat ko‘rsatmoqda. O‘quvchilarning ijodiy qobiliyatini to‘g‘ri yo‘naltirish, ularga o‘z qiziqishi va intilishi bo‘yicha kasb-hunarning boshlang‘ich sirlarini o‘rgatishda mazkur markazlarning ahamiyati katta bo‘lmoqda. "Sog‘lom ona va bola yili" Davlat dasturi doirasida Xalq ta’limi vazirligi tomonidan ushbu markazlar faoliyatini yanada takomillashtirish, o‘quvchi-yoshlarning bo‘sh vaqtini mazmunli o‘tkazish yuzasidan turkum loyihalar, ijodiy tanlovlar, festivallar muntazam o‘tkazib kelinmoqda. Ilk marta o‘tkazilgan "Bolalarning texnik ijodkorligi" festivali shunday tadbirlar sirasidandir. Festival-tanlovdan ko‘zlangan maqsad bolalarning zamonaviy axborot-kommunikatsiya texnologiyalariga bo‘lgan qiziqishini yanada rivojlantirish, texnik ijodkorligini rag‘batlantirishdan iboratdir. "Barkamol avlod" markazlari qoshidagi ekologiya va o‘lkashunoslik, badiiy va texnik ijodiyot kabi to‘garaklarda o‘g‘il-qizlar turli yo‘nalishlar bo‘yicha bilim va mahoratini boyitmoqda. – Men bir necha yildan buyon komputer saboqlari bo‘yicha to‘garakka qatnayman, – deydi Sirdaryo viloyati Guliston tumanidagi 2-maktabning 9-sinf o‘quvchisi Shohrux Turdiqulov. – Festival-tanlov uchun chorrahaga o‘rnatiluvchi robot yasadim. U transport vositalarini tartibga solishi bilan birga turli yo‘l hodisalarining oldini oladi. – O‘quvchilar tomonidan tayyorlangan turli avia-raketa modellar, texnik ishlanmalar ularning to‘garaklar orqali olgan bilim va ko‘nikmalari, boy xayolot olamini aks ettirishi bilan birga qiziqishi, aniq maqsad sari dadil intilishining o‘ziga xos ifodasidir, – deydi Navoiy viloyati "Barkamol avlod" bolalar markazi metodisti Nazira Rahimova. – Bunday texnik ijodiyot to‘garaklari natijasida o‘quvchilarning fizika, matematika, kimyo, komputer texnologiyalari kabi fanlarni o‘zlashtirishida ijobiy natijalar ko‘zga tashlanmoqda. Festival-tanlov yakuniga ko‘ra 20 nafardan ortiq o‘quvchi-yoshlar avtomodel, avia-raketamodel, kemasozlik, robototexnika, elektron o‘yinchoqlar, radiotexnika, elektronika va aloqa, fotohavaskorlik yo‘nalishlarida diplom va esdalik sovg‘alari bilan taqdirlandi.

Yana...

©2017 O`zR XTV huzuridagi MUDRM
Portalning eski ko'rinishi
Yo'riqnoma


Xato ko'rsangiz belgilang va Ctrl+Enter ni bosing
Топ рейтинг www.uz